Haxhiu priti ministrin Hoxha, biseda për bashkëpunimin dhe rrugën euroatlantike

U.d. Presidentja e Kosovës, Albulena Haxhiu, priti sot në takim Ministrin për Evropën dhe Punët e Jashtme të Shqipërisë, Ferit Hoxha.

Haxhiu e përgëzoi Hoxhën për detyrën e re dhe vlerësoi përvojën e tij të gjatë diplomatike. Ajo theksoi se Hoxha ka shërbyer si zë për Kosovën në periudha kur vendi nuk kishte përfaqësim të fortë në arenën ndërkombëtare.

Sipas komunikatës së Presidencës, në bisedën e tyre u trajtuan marrëdhëniet ndërmjet dy vendeve, koordinimi i politikës së jashtme si dhe çështjet lidhur me zbatimin e marrëveshjeve të nënshkruara ndërmjet Kosovës dhe Shqipërisë.

U.d. Presidentja nënvizoi se afërsia historike, gjuhësore dhe kulturore përbën një themel të fortë për intensifikimin e bashkëpunimit institucional dhe për projekte që synojnë shërbimin e drejtpërdrejtë për qytetarët e të dy vendeve.