Trump: Irani ka pranuar garanci për programin bërthamor
Presidenti amerikan Donald Trump tha se Teherani ka dhënë garanci se nuk do të zhvillojë armë bërthamore, ndërsa negociatat për një marrëveshje mbeten të vështira.
Presidenti i Shteteve të Bashkuara, Donald Trump, ka deklaruar se Irani ka dhënë garanci lidhur me programin e tij bërthamor, duke thënë se Teherani nuk do të zhvillojë armë bërthamore.
Në një intervistë të transmetuar më 30 maj, Trump tha se Uashingtoni është afër një marrëveshjeje që, sipas tij, do të mund t’i jepte fund luftës tre mujore me Teheranin.
Deklaratat erdhën në një kohë kur raportimet flasin për një propozim të ri amerikan dërguar autoriteteve iraniane, i cili përshkruhet si më i ashpër në kuadër të përpjekjeve për paqe.
Nga ana tjetër, një këshilltar i lartë i udhëheqësit suprem të Iranit ka kritikuar qasjen e Trumpit, duke e akuzuar atë për dëmtim të diplomacisë dhe për paraqitje kërkesash të tepruara në negociata.
Programi bërthamor iranian vazhdon të jetë një nga çështjet kryesore që pengon arritjen e një marrëveshjeje, ndërsa tensionet mes palëve kanë ndikuar edhe në tregjet globale të energjisë dhe në ekonominë botërore.
